‘ଚୋର’ ପାଇଁ ଆସାମ ଓ ମିଜୋରାମ ମଧ୍ୟରେ ପୁଣି ଥରେ ଉତ୍ତେଜନା
ନିର୍ମାଣ ପାଇଁ ଆସିଥିବା ସାମଗ୍ରୀକୁ ନେଇଥିବା ଅଭିଯୋଗରେ ଆସାମ ପୁଲିସକୁ ଚୋର କହିଲା ମିଜୋରାମ
Get real time updates directly on you device, subscribe now.
ନୂଆଦିଲ୍ଲୀ: ଉତ୍ତରପୂର୍ବ ରାଜ୍ୟ ଆସାମ (Assam) ଓ ମିଜୋରାମ ମଧ୍ୟରେ ପୁଣିଥରେ ତିକ୍ତତା ଦେଖାଦେଇଛି । ସୀମା ବିବାଦକୁ ନେଇ ଏହି ତିକ୍ତତା ବୃଦ୍ଧି ପାଇଛି । ଆସାମ ଏବଂ ମିଜୋରାମ ମଧ୍ୟରେ ବିବାଦୀୟ ୧୬୪.୬ କିଲୋମିଟର ସୀମାରେ ରବିବାର ପୁଣି ଉତ୍ତେଜନା ଦେଖାଦେଇଛି । ଆସାମ ଏହାର ପଡୋଶୀ ରାଜ୍ୟକୁ ନିଜ ଅଞ୍ଚଳ ଉପରେ ଏକ ସେତୁ ନିର୍ମାଣ କରିଥିବା ଅଭିଯୋଗ କରିଛି। ଏଥିସହ ମିଜୋରାମ ପୋଲିସ ଉକ୍ତ ସ୍ଥାନରୁ ନିର୍ମାଣ ସାମଗ୍ରୀ ଚୋରି ଅଭିଯୋଗରେ ଆସାମ ପୋଲିସ ବିରୋଧରେ ଏକ ମାମଲା ରୁଜୁ କରିଛି। ତେବେ ରବିବାର ମଧ୍ୟ ଏହି ମାମଲା ପ୍ରତ୍ୟାହାର କରାଯାଇଥିବା ନେଇ ସୂଚନା ରହିଛି।
ଆସାମର ଅଧିକାରୀ ଅଭିଯୋଗ କରିଛନ୍ତି କି ମିଜୋରାମର ଅଧିକାରୀମାନେ ରାଜ୍ୟର ହାଲାକାଣ୍ଡି ଜିଲ୍ଲାରେ ବେଆଇନ ଭାବେ ପ୍ରବେଶ କରିଥିଲେ । ଶୁକ୍ରବାର ରାମନାଥପୁର ଥାନା ଅଞ୍ଚଳରେ ପୋଲ ନିର୍ମାଣ ଆରମ୍ଭ କରିଦେଇଥିଲେ । ଗତ ମାସରେ ହିଂସାତ୍ମକ ବିରୋଧ ପରେ ଦୁଇ ସରକାର ଶାନ୍ତିପୂର୍ଣ୍ଣ କଥାବାର୍ତ୍ତା ପାଇଁ ରୋଡ୍ ମ୍ୟାପ୍ ଘୋଷଣା କରିଥିଲେ।
ଏହି ପରିପ୍ରେକ୍ଷୀରେ ମିଜୋରାମ ଅଧିକାରୀ କହିଛନ୍ତି ଯେ ମିଜୋରାମ ଅଞ୍ଚଳ ଥିବା ବାଇରାବି ସହର ନିକଟ ଜୋଫାଇରେ ଏହି ସେତୁ ନିର୍ମାଣ କରାଯାଉଛି। ଏଥି ସହ ମିଜୋରାମ ଆସାମ ପୋଲିସକୁ ନିର୍ମାଣ ସାମଗ୍ରୀ ଚୋରି କରିଥିବା ଅଭିଯୋଗ କରିଛନ୍ତି। ମିଜୋରାମ ଅଧିକାରୀ କହିଛନ୍ତି ଯେ ଆସାମ ପୋଲିସ ନିର୍ମାଣ ସାମଗ୍ରୀ ଫେରସ୍ତ କରିବା ପରେ ରବିବାର ଆସାମ ଅଧିକାରୀଙ୍କ ବିରୋଧରେ ଦାଖଲ ହୋଇଥିବା ଚୋରି ମାମଲା ପ୍ରତ୍ୟାହାର କରାଯାଇଛି। ଯେହେତୁ ଆସାମ ପୋଲିସ କୌଣସି ପ୍ରକାରର ସାମଗ୍ରୀ ଚୋରିକୁ ସମ୍ପୂର୍ଣ୍ଣ ଭାବେ ଅସ୍ୱୀକାର କରିଛି।
ଏହା ଜଣା ଯେ ଗତ ମାସରେ ଅର୍ଥାତ୍ ୨୬ ଜୁଲାଇରେ ଉଭୟ ରାଜ୍ୟର ପୋଲିସ୍ ଫୋର୍ସ ମୁହାଁମୁହିଁ ହୋଇଥିଲେ ଯେଉଁଥିରେ ଆସାମର ୬ ଜଣ ପୋଲିସ୍ ଗୁଳିରେ ପ୍ରାଣ ହରାଇଥିଲେ ଏବଂ ପ୍ରାୟ ୪୦ ଜଣ ଆହତ ହୋଇଥିଲେ। ସେତୁ ନିର୍ମାଣକୁ ନେଇ ବିବାଦ ଶନିବାର ସାମ୍ନାକୁ ଆସିଛି। ମିଜୋରାମ ପୋଲିସର କହିବାନୁସାରେ, “ଆସାମ ପୋଲିସ ସେତୁ ନିର୍ମାଣ ସ୍ଥଳରେ କାର୍ଯ୍ୟ କରୁଥିବା ଶ୍ରମିକମାନଙ୍କ ପାଇଁ ସମସ୍ୟା ସୃଷ୍ଟି କରିଥିଲା ଏବଂ ଲୁହା ରଡ ଖଣ୍ଡ ସହିତ କିଛି ନିର୍ମାଣ ସାମଗ୍ରୀ ମଧ୍ୟ ଚୋରି କରିଥିଲା। ନିର୍ମାଣ ସାମଗ୍ରୀ ଚୋରି ବିରୋଧରେ ବାଇରାବି ପୋଲିସ ଷ୍ଟେସନରେ ସେମାନଙ୍କ ବିରୋଧରେ ପୋଲିସ ମାମଲା ରୁଜୁ ହୋଇଛି।
ଜିଲ୍ଲାର ଡେପୁଟି କମିଶନର ଏକ ଚିଠିରେ ଲେଖିଛନ୍ତି ଯେ ଜଣେ ସରକାରୀ କର୍ମଚାରୀଙ୍କ ଦ୍ୱାରା ଏପରି କାର୍ଯ୍ୟ କରିବା ସରକାରୀ ସମ୍ପତ୍ତି ଚୋରି ବୋଲି ଅଭିଯୋଗ କରାଯାଇପାରେ । ଏହା ଅତ୍ୟନ୍ତ ନିରାଶାଜନକ ଏବଂ ଅତ୍ୟନ୍ତ ଗମ୍ଭୀର ବୋଲି ବିବେଚନା କରାଯାଇଛି। ତେବେ ଆସାମ ପୋଲିସ ଏହି ଅଭିଯୋଗକୁ ଅସ୍ୱୀକାର କରି କହିଛି ଯେ ବିନା ଅନୁମତିରେ ଆସାମ ଅଞ୍ଚଳରେ ଏହି ସେତୁ ନିର୍ମାଣ କରାଯାଉଛି। ବାସ୍ତବରେ ଆସାମର କାଚର, କରିମଗଞ୍ଜ ଏବଂ ହାଇଲାକାଣ୍ଡି ଜିଲ୍ଲା ମିଜୋରାମର ଆଇଜାୱଲ, କୋଲାସିବ ଏବଂ ମମିତ ଜିଲ୍ଲା ସହିତ ୧୬୪.୬ କିଲୋମିଟର ଲମ୍ବା ସୀମାକୁ ଲାଗି ରହିଛି। ଦଶନ୍ଧି ପୁରୁଣା ସୀମା ବିବାଦ ମୁଖ୍ୟତଃ ଧାରଣାର ପାର୍ଥକ୍ୟରୁ ଆସିଥାଏ | ମିଜୋରାମ ୧୮୭୫ର ସୀମା ଚୁକ୍ତିନାମା ଅନୁଯାୟୀ ଯାଇଥାଏ କିନ୍ତୁ ଆସାମ ୧୯୩୩ର ବିଭାଜନକୁ ଅନୁସରଣ କରେ ।
